PJONGJANG – Sjeverna Koreja proglasila je Južnu Koreju „neprijateljskom državom“ i potvdila je da je prekinula komunikaciju sa tom zemljom, prenela je jutros državna agencija KCNA.
„Ovo je neizbježna i legitimna mera preduzeta u skladu sa zahtjevima Ustava DNRK (zvanični naziv Sjeverne Koreje) koji jasno definiše RK kao neprijateljsku državu“, objavila je KCNA, koristeći zvanični naziv Južne Koreje – Republika Koreja.
Agencija je takođe prenela da su drumske i železničke veze sa Južnom Korejom na sjevernokorejskoj strani granice, koje su bile postavljene kao prelazi, sada potpuno blokirane kao dio „faznog potpunog odvajanja“ od juga.
Južna Koreja je saopštila da je njena politika da nastavi da teži nacionalnom ujedinjenju, ali da će da odgovori silom ukoliko Sjeverna Koreja pokaže bilo kakav oblik agresije.
Prošle nedjelje, sjevernokorejska vojska je najavila plan da „potpuno odvoji“ teritoriju Sjeverne Koreje od Južne Koreje, navodeći da je obavijestila američku vojsku o tom potezu kako bi „spriječila bilo kakvo pogrešno tumačenje i slučajne sukobe“.
Dvije Koreje su povezane putevima i željeznicama duž Gjeongui linije, koja povezuje južnokorejski pogranični grad Paju sa sjevernokorejskim Kaesongom i Donghai linije duž istočne obale.
Ovaj potez je preduzet u trenutku kada Sjeverna Koreja pojačava međukorejske tenzije nakon što je njen vođa Kim Džong-un krajem prošle godine definisao dvije Koreje kao „dvije neprijateljske države,“ preduzimajući korake za rušenje međukorejskih kopnenih ruta.
Sjeverna Koreja je od tada uklonila ulične svjetiljke i postavila mine duž svoje strane Gjeongui i Donghi linija i rasporedila vojnike za izgradnju protivtenkovskih barijera i jačanje ograde od bodljikave žice na svojoj strani Demilitarizovane zone koja dijeli dvije zemlje.
Tenzije su dodatno porasle nakon što je Sjeverna Koreja saopštila da je ovog mjeseca južnokorejska vojska tri puta slala dronove iznad Pjongjanga.
Kim Jo-Džong, uticajna sestra sjevernokorejskog lidera upozorila je na „užasnu katastrofu“ ako južnokorejske bespilotne letelice ponovo budu detektovane iznad Pjongjanga.
