Fudbalska reprezentacija Francuske je nakon penal drame protiv Portugala obezbijedila plasman u polufinale Eura gdje ih čeka duel sa Španijom.
Fudbaleri Francuske u drugoj utakmici današnjeg programa četvrtfinala savladali su Portugal rezultatom 5:3 nakon boljeg izvođenja penala. Tragičar penal završnice bio je Žoao feliks koji je pogodio stativu.
Igralo se tvrdo, oprezno i bez velikih uzbuđenja u prvom poluvremenu utakmice u Hamburgu. Veliki ulog gledaocima nije priuštio previše uzbuđenja na terenu.
Na prvi ozbiljniji napad na utakmici čekalo se više od 15 minuta. Režirao ga je Bruno koji je istrčao nekoliko metara i šutirao. Ipak, njegov pokušaj izblokirao je Saliba pa je sve završeno samo udarcem iz kornera koji nije donio veća uzbuđenja pred golom.
Pet minuta kanije publiku je probudio Hernandez. Snažno je šutirao, ali je još bolje intervenisao Diogo Košta i spriječio vodstvo Francuza. Nije se ništa izrodilo ni iz akcije u 28. minutu kada je Mbape prošao Nunu Mendeša, ali je sve ipak završeno na tome.
Fudbaleri Francuske pokušali su zaprijetiti i u 34. minutu. Kunde je pronašao Mbapea, lopta je potom završila kod Grizmana, a opasnost otklonio Bruno Fernandeš.
Nadu navijačima Portugala da će poluvrijeme završiti vodstvom njihovog tima probudio je slobodan udarac u 41. minuti, koji je umjesto Ronalda koji se spremao, ipak izveo veznjak Portugala Bruno, ali izuzetno loše.
Zvanična statistika prvog poluvremena kaže da je Francuska imala čak 18 obećavajućih napada, a Portugal 16, međutim ništa od toga nije završilo u mreži pa se na odmor otišlo sa rezultatom 0:0.
Početak drugog poluvremena bio je repriza prvih 45 minuta bez puno uzbuđenja, ali smo od 60. minute ipak vidjeli nešto dinamičniju igru oba tima.
Bruno Fernandeš je u 61. minutu bio tvorac prve ozbiljnije prilike na meču. Izašao je sam pred francuskog golmana Manjana koji je ipak bio na visini zadatka. Zatim je u nastavku akcije i Kanselo poslao loptu preko gola.
Dvije minute kasnije Portugal je zaprijetio preko Vitinja, ali je Manjan bio opet siguran.
U 66. minuti dupli pas su odigrali Kolo Muani i Kundeo, ali je Diaš uspio šutirati ispred njega. Odličnu priliku imao je u 70. minutu Kamavinga koji iz peterca nije savladao golmana Portugala.
Četiri minute kasnije nije se najbolje snašao ni rezervista Dembele, koji loptu šalje pored gola. Do isteka 90 minuta igre prilike su imali još Kante nakon kontre Francuza, kao i Mbape poslije dodavanja Dembelea, ali je utakmica ipak ušla u produžetke.
Nekoliko prilika oba tima stvorila su i u dodatnih 30 minuta igre, ali nijedna dovoljno dobra da bi se rezultat mijenjao pa je odluka o pobjedniku i polufinalisti ipak donijeta nakon jedanaesteraca.
Penal lutrija ipak je pripala Francuzima čiji su svi izvođači penala bili precizni, dok je na drugoj strani Žoao Feliks u trećoj seriji zatresao stativu.
Ranije danas plasman u Polufinale ostvarila je reprezentacija Španije koja je nakon produžetaka savladala domaćina njemačku rezultatom 2:1. Dvije preostale utakmice četvrtfinala igraju se sutra. Od 18 časova sastaju se Engleska i Švajcarska, dok od 21 čas svoj međusobni meč igraju Nizozemska i Turska.
